Surat Na famous Tomato Na Bhajiya Recipe l સુરતના પ્રખ્યાત ટામેટાના ભજીયા: ટામેટાના ભજીયાનું નામ આવે એટલે સુરતના ડુમ્મસ બીચ પર મળતા ટામેટાના ભજીયા યાદ આવે. સુરતના પ્રખ્યાત ટામેટાના ભજીયામાં સાચી કમાલ ગ્રીન ચટણીની છે. આ ગ્રીન ચટણી કેવી રીતે બનાવવી તેની રેસિપી પણ ગુજરાતી જાગરણ તમને અહીં મોકલશે.
સુરતના પ્રખ્યાત ટામેટાના ભજીયાની સામગ્રી: (સુરતના પ્રખ્યાત ટામેટાના ભજીયા બનાવવાની રીત | Tomato Bhajiya | pakoda recipe)
ચટણી માટે:
- ટામેટાં: 2 મધ્યમ કદના, કાપેલા
- ડુંગળી: 1 મધ્યમ કદની, કાપેલી
- આદુ-લસણની પેસ્ટ: 1 ટેબલસ્પૂન
- લીલા મરચાની પેસ્ટ: 1 ટેબલસ્પૂન
- જીરું: 1/2 ટી સ્પૂન
- મીઠું: 1 ટી સ્પૂન કરતાં ઓછું (સ્વાદ મુજબ)
- લાલ મરચાનો પાવડર: 1/2 ટી સ્પૂન
- કાશ્મીરી લાલ મરચાનો પાવડર: 1 ટી સ્પૂન
- ખાંડ: 1 ટેબલસ્પૂન
- તેલ: 1 ટેબલસ્પૂન
ભજીયાના બેટર માટે:
- ચણાનો લોટ (બેસન): 1 કપ
- ચોખાનો લોટ: 2 ટેબલસ્પૂન
- મીઠું: 1 ટી સ્પૂન
- આદુ-લસણની પેસ્ટ: 1 ટી સ્પૂન
- લીલા મરચાની પેસ્ટ: 1 ટી સ્પૂન
- આખા ધાણા: 1 ટી સ્પૂન (થોડા ક્રશ કરેલા)
- હળદર: 1/4 ટી સ્પૂન
- ગરમ મસાલો: 1/2 ટી સ્પૂન
- પાણી: 1/2 કપ કરતાં ઓછું (બેટરની જરૂરિયાત મુજબ)
- જીરાળું: 1/2 ટી સ્પૂન
- કુકિંગ સોડા: 1 ચપટી
- તળવા માટે તેલ: જરૂર મુજબ
અન્ય સામગ્રી:
લાલ ટામેટાં: મધ્યમ કદના અને કડક, સ્લાઈસ કરવા માટે
આ રીતે સુરતના પ્રખ્યાત ટામેટાના ભજીયા ઘરે બનાવો (Surti Tameta na bhajiya recipe)
1). ચટણી તૈયાર કરવી:
- એક મિક્સર ગ્રાઈન્ડરમાં કાપેલા ટામેટાં, ડુંગળી, આદુ-લસણની પેસ્ટ, લીલા મરચાની પેસ્ટ, જીરું, મીઠું, લાલ મરચાનો પાવડર, કાશ્મીરી લાલ મરચાનો પાવડર, ખાંડ અને 1 ટેબલસ્પૂન તેલ લો.
- પાણી ઉમેર્યા વગર, આ બધી સામગ્રીને એકદમ ઘટ્ટ અને લીસી પેસ્ટ બને ત્યાં સુધી પીસી લો. તમારી ચટણી તૈયાર છે.
2). ભજીયાનું બેટર બનાવવું:
- એક મોટા બાઉલમાં ચણાનો લોટ અને ચોખાનો લોટ ભેગા કરો.
- તેમાં મીઠું, આદુ-લસણની પેસ્ટ, લીલા મરચાની પેસ્ટ, ક્રશ કરેલા આખા ધાણા, હળદર, ગરમ મસાલો અને 2 ટેબલસ્પૂન તેલ ઉમેરો.
- હવે ધીમે ધીમે પાણી ઉમેરતા જાઓ અને હાથથી અથવા ચમચાથી હલાવીને એકદમ સ્મૂથ અને ઘટ્ટ બેટર તૈયાર કરો. બેટરની કન્સિસ્ટન્સી મધ્યમ જાડી હોવી જોઈએ, ખૂબ પાતળી નહીં. આ માટે 1/2 કપ કરતાં ઓછું પાણી લાગશે.
- જ્યારે તમે ભજીયા તળવા જઈ રહ્યા હો, ત્યારે બેટરમાં 1/2 ટી સ્પૂન જીરાળું અને 1 ચપટી કુકિંગ સોડા ઉમેરીને હળવા હાથે મિક્સ કરી લો. સોડા ઉમેર્યા પછી વધારે હલાવવું નહીં.
3). ટામેટા તૈયાર કરવા:
- મધ્યમ કદના લાલ અને કડક ટામેટાં લો. એક ટામેટામાંથી 4 થી 5 પાતળી ગોળ સ્લાઈસ તૈયાર કરો. સ્લાઈસ વધારે જાડી કે પાતળી ન હોવી જોઈએ.
- હવે, દરેક ટામેટાની સ્લાઈસ પર તૈયાર કરેલી ચટણીનું એક ઘટ્ટ લેયર લગાવો. એક સ્લાઈસ પર લગભગ એક ચમચી જેટલી ચટણી લગાડી શકાય છે.
- ચટણી લગાવેલી સ્લાઈસ ઉપર બીજી ટામેટાની સ્લાઈસ મૂકીને એક સેન્ડવીચ જેવું તૈયાર કરો.
4). ભજીયા તળવા:
- એક કડાઈમાં તળવા માટે તેલ ગરમ કરવા મૂકો. તેલ મધ્યમ ગરમ હોવું જોઈએ.
- તૈયાર કરેલી ટામેટા-ચટણીની સેન્ડવીચને બેટરમાં બરાબર ડુબાડો, જેથી ટામેટું સંપૂર્ણપણે બેટરથી કવર થઈ જાય.
- બેટર લગાવેલી ટામેટાની સ્લાઈસને ધીમેથી ગરમ તેલમાં મૂકો. એકસાથે વધારે ભજીયા ન નાખવા.
- ભજીયાને તરત જ પલટાવવા નહીં. નીચેની બાજુ થોડા ચડી જાય અને ગોલ્ડન થાય ત્યાં સુધી થવા દો.
- પછી ધીમેથી પલટાવીને બીજી બાજુ પણ ગોલ્ડન અને ક્રિસ્પી થાય ત્યાં સુધી તળી લો.
- બધા ભજીયા ગોલ્ડન બ્રાઉન અને ક્રિસ્પી થાય ત્યાં સુધી તળીને તેલમાંથી કાઢી લો.
- તૈયાર છે સુરતના પ્રખ્યાત, અંદરથી ચટપટા અને બહારથી ક્રિસ્પી ટામેટાના ભજીયા!